میدان وردګو کې د ترافیکي پېښې له کبله ۶ کسانو ته مرګ ژوبله اوښتې

د میدان وردګو امنیتي مسوولینو د کابل-کندهار پر لویه لاره په سید آباد ولسوالۍ کې د یوې ترافیکي پېښې له امله ۶ کسانو ته د مرګ ژوبلې اوښتو خبر ورکړی دی. د ميدان وردګو ولايت د امنیې قومندانۍ ویاند یوسف اسرار وايي، چې د کابل-کندهار لویې لارې په اوږدو کې د سيدآباد ولسوالۍ د شنيز درې په مشنګ قلعه سیمه کې د مازدا او کرولا موټر د ټکر له امله يو کس مړ شوی او ۵ تنه نور ټپيان شوي دي. د نوموړي په وینا چې د پېښې ټپيان د همدې سیمې روغتيايي مرکز ته انتقال شوي دي. د یادونې وړ ده، چې په لوګر او سمنګانو ولایتونو کې هم په ورته بېلابېلو ترافیکي پېښو کې ۹ کسانو ته مرګ ژوبله اوښتې ده.