د پاکستان حکومت د دغه هېواد پر يوې دولتي دفاعي ادارې او ۳ سوداګريزو شرکتونو باندې د امريکا د بندیزونو پرېکړه له تعصب ډکه بللې ده. د پاکستان د بهرنيو چارو وزارت په خپله وېبپاڼه په خپاره کړي بيان کې ويلي دي چې د پاکستان ستراتیژیکې وړتیاوې د خپل حاکمیت د دفاع او په جنوبي اسیا کې د سولې او ثبات د ساتلو لپاره دي. په بيان کې راغلي دي چې د امريکا لخوا وروستي بنديزونه د سولې او امنیت هدف له پامه غورځوي، او دا ډول تګلارې د سیمې او له هغې بهر د ستراتیژیک ثبات لپاره خطرناکې پایلې لري. امريکا د ډسمبر په ۱۸ ویلي چې پر پاکستان د لیرې واټن د باليسټیک توغندیو د پروګرام له کبله نوي بندیزونه لګوي. د امريکا د بهرنیو چارو وزارت ویاند متیو میلر په یوه بیان کې وویل چې دا بنديزونه د يو اجرايي امر له مخې د پاکستان د ملي پرمختیا ادارې او دريو شرکتونو لګول شوي چې هدف يې “د ډله يیزې ویجاړۍ د وسلو پراخولو او د هغوی د وسیلو” مخنيوی دی.
- Trending
- Comments
- ورستی
