خلیلزاد: پاکستان دې د افغان کډوالو د ایستلو لړۍ ودروي

د افغان سولې لپاره د امریکا پخواني استازي زلمي خلیلزاد پر خپله اېکس پاڼه لیکلي چې پاکستان باید له افغان کډوالو سره په خپل هېواد کې ناقانونه چلند پای ته ورسوي. خلیلزاد دا څرګندونې د پاکستاني پولیسو د هغو تازه کړنو په غبرګون کې کړي‌ چې له تېرو څو ورځو راهیسې یې په اسلام اباد کې د افغان کډوالو د نیول کیدو لپاره کور په کور بېړني عملیات پیل کړي دي. خلیلزاد له دغه هېواده غوښتي چې ژر تر ژره دې د افغانانو د نیول کیدو لړۍ ودروي او له اېستل کیدو څخه دې یې هم ډډه وکړي. د روان زیږدیز کال د لومړۍ میاشتې له لومړۍ نېټې راهیسې پاکستاني پولیسو د استوګنې د قانوني اسنادو د نه لزلو په پلمه په اسلام اباد کې سلګونه افغان کډوال نیولي چې ځنې یې بېرته خوشې کړي؛ خو ډېر شمېر یې د تورخم له لارې افغانستان ته اړول شوي دي.