کډوالو وزارت؛ سرپرست وزیر د قطر هېواد له شارژدافیر سره کتلي دي

د کډوالو چارو سرپرست وزیر په کابل کې د قطر هېواد له شارژدافیر مرُدف القاشوطي سره کتلي دي. یاد وزارت پر اېکس پاڼه په لیکلي بیان کې ویلي، چې‎‎‎‎‎‎ په دې کتنه کې له افغان کډوالو سره پر مرستو او همکاریو خبرې شوې دي. القاشوطي له افغان کډوالو سره د قطر د مرستو د دوام ډاډ ورکړ او زیاته کړې یې ده، چې د افغانستان له ګاونډیو هېوادونو څخه په مناسب ډول د افغان کډوالو د راستنېدو په برخه کې د کډوالو لپاره د ملګرو ملتونو له عالي کمیشنرۍ سره په همکارۍ غور کوي. هغه د خبرو پر دوام څرګنده کړه، چې د قطر ولس او مرستندویه بنسټونه له افغانانو سره مرستو ته لېواله دي او له همدې امله د قطر د سرې میاشتې ټولنې او قطر الخيريه بنسټ په کابل کې فعالیت پیل کړی دی. مولوي عبدالکبیر د افغان کډوالو د ستونزو د حل او همکاریو له امله د قطر هېواد له مرستو مننه وکړه.