پروان؛ د اختر په ورځو کې ۳۰ زره کورني سیلانیان ورغلي دي

د پروان ولایت د اطلاعاتو او فرهنګ ریاست مسوولین وايي چې د کوچني اختر په ورځو کې شاوخوا ۳۰زره کورنیو سیلانیانو د یاد ولایت له تفریحي او تاریخي سیمو لیدنه کړې ده. د مسوولینو په خبره یاد شمېر سیلانیان د ګل‌غونډۍ، د جبل‌السراج شاهي ماڼۍ، د توپ‌‌درې ستوپه، د بګرام کافر کلا، غوربند درې، سالنګ درې، د ګلبهار عمومي باغ، صیاد علیا او نورو سیمو ته ورغلي دي. مسوولین زیاتوي، چې د اختر په ورځو کې د سرپرست حکومت یوشمېر لوړپوړي چارواکي هم دغه ولایت ته ورغلي دي. پروان د هیواد یو له هغو ولایتونه څخه دی، چې پراخې شنې سیمې او تاریخي ځایونه لري. یاد ولایت ته، د نوي کال په پیل کې هم سیلانیان د تفرېحې او چکر لپاره ورځي.