سپینه ماڼۍ: کرونا به تر اګسټ پورې ۸۲ زره امریکایان مړه کړي

سپینه ماڼۍ وايي چې ښايي کرونا په امریکا کې تر اګسټ میاشت پورې زرګونه کسان ووژني. سپينې ماڼۍ په تازه څرګندونو کې ویلي چې که خلک د ډاکټرانو او حکومت سپارښتنو ته پاملرنه و نه کړي نو ښایي کرونا تر اګسټ میاشتې پورې ۸۲ زره کسان ووژني. تر دې وړاندې د امریکا ولسمشر ډونالډ ټرمپ ویلي وو چې ښايي د کرونا ویروس له امله د سلو او دوه سو زرو ترمنځ امریکایان مړه شي. نوموړي له خلکو غوښتي چې ددوی سپارښتنو ته پاملرنه وکړي او د ځان د خوندیتوب لپاره جدي اقدامات ترسره کړي. امریکا کې کرونا ویروس تر بل هر ځای د چټکې پراختیا په حال کې دی او دمګړی په دغه هېواد کې تر ۴۳۴ زره ډېر کسان په کرونا ویروس اخته شوي دي.