زلمی خلیلزاد: د سولې هوکړې په اړه امنیت شورا خپل پرېکړه لیک تصویب کړ

د ملګرو ملتونو امنیت شورا د امریکا او طالبانو ترمنځ د سولې هوکړې په اړه یو پرېکړه لیک تصویب کړی دی. د افغان سولې لپاره د امریکا د بهرنیو چارو وزارت ځانګړی استازی زلمی خلیلزاد وایي د ملګرو ملتونو امنیت شورا د رایو په اکثریت دغه پرېکړه لیک تصویب کړی دی. دده په خبره ددې پرېکړه لیک تصویب ښيي چې ملګري ملتونه او نړیوال د افغانستان د ثبات او نړیوالې سولې لپاره د امریکا له هڅو ملاتړ کوي. د خلیلزاد په وینا پرېکړه لیک همدا راز له افغان حکومت او طالبانو غواړي چې د سولې لپاره هڅې چټکې کړي، د باور جوړولو بهیر چټک کړي او ژر تر ژره د جګړې د پای ته رسولو لپاره اقدامات ترسره کړي. نوموړي د سولې په برخه کې د نورو پرمختګونو لپاره د هڅو ژمنه هم کړې ده.