ملګرو ملتونو؛ په افغانستان کې د ټولشموله حکومت پر جوړېدو ټینګار کړی

په افغانستان کې د ملګرو ملتونو د مرستندویه دفتر له لوري په خپره شوې خبرپاڼه کې راغلي چې ددغه دفتر مشر تادامیچي یاممتو له عبدالله عبدالله سره کتلي دي. په دې لیدنه کې دواړو لورو پر رامنځ ته شوو مسایلو او سولې خبرې کړې دي. یاممتو ټینګار کړی دی چې دواړه مشران دې سره یو ځای شي او د یوه ټولشموله حکومت په جوړولو دې سره سلا شي. دده په خبره دوی دې داسې یو حکومت جوړ کړي چې ټول افغانان ځانونه پکې ګډ وبولي. یاممتو ویلي دداسې یوه حکومت جوړول د سولې د پروسې لپاره مهم دي. ملګرو ملتونو داسې مهال د ټولشموله حکومت د جوړولو لپاره هڅې پیل کړې چې تر دې وړاندې په دې اړه د امریکا منډې ترړې ناکامې شوې دي.