کرونا؛ اروپا کې د تازه اقداماتو او قرنطین لړۍ روانه ده

په ټوله اروپا کې د کرونا ویروس پر وړاندې د تازه اقداماتو او قرنطین لړۍ روانه ده. اروپايي رسنۍ وایي چې کرونا په اروپايي هېوادونو کې سخت ناورین رامنځ ته کړی دی. په ایټالیا کې د کرونا ویروس له امله د وژل شوو او نوو اخته شوو کسانو شمېره لوړه شوې ده. د وروستیو شمېرو له مخې په ايتالیا کې ۲۱۱۵۷ کسان په دغه ویروس اخته دي او ۱۸۰۰ کسه یې وژلي دي. په فرانسه کې هم وضعیت ترینګلی دی او پر تګ راتګ بندیز لګول شوی دی. هسپانیه تر ایټالیا وروسته د کرونا تر ټولو ډېرې مثبتې پېښې لري. المان بیا غواړي چې نن له فرانسې او ځینو نورو هېوادونو سره پولې وتړي او دغه راز یې له خلکو غوښتي چې له غیر ضروري تګ راتګ ډډه وکړي. په اروپا کې په ډيری هېوادونو کې کنفرانسونه لغوه شوي پر تجمعاتو بندیز دی او خلک یوازې خپلو کارونو او د خوراکي توکو اخیستو لپاره له کورونو وتلی شي. امریکا کې هم کرونا د پراختیا په حال کې ده او په ایران کې یې هم د قربانیانو شمېر لوړ شوی دی.