د روغتیا نړیوال سازمان ویلي چې پر کرونا ویروس د ټولو اخته کسانو شمېر له ۱۶۲ زرو او له دې کبله د مړو شمېر له ۶ زرو اوښتی دی.
په ورته وخت کې د دغه ویروس چټک خپرېدو نړۍ د اقتصادي بحران له ګواښ سره مخ کړې؛ ځکه کاروبار او سوداګري په ټپه درېدلي او د هېوادونو مرکزي بانکونه اړ شوي دي چې د مالي بازارونو د سقوط د مخنیوي لپاره جدي اقدامات وکړي.
په اروپا کې چې د روغتیا نړیوال سازمان د کرونا ویروس د خپرېدو مرکز بللی، ډېری هېوادونو د وقایوي اقداماتو په ترڅ کې ورځنۍ چارې او نړیوالې الوتنې ځنډولې دي.
په اسپانیا کې وروسته له هغې چې د ۲۰۰۰ نویو پېښو راپور ورکړل شو، د دغه هېواد حکومت تېره ورځ بېړنی حالت اعلان کړی دی.
د راپورونو له مخې، په اسپانیا کې پر یاد ویروس د اخته کسانو شمېر ۸ زرو ته نږدې شوی چې له اېټالیا وروسته دا په اروپا کې تر ټولو لوړه شمېره ده.
بلخوا چینایي چارواکو بیا ویلي چې په دغه هېواد کې د کرونا ویروس په پېښو کې د پام وړ کموالی راغلی دی، خو د یاد هېواد چارواکو په هوایي ډګرونو کې د بهرنیو مسافرو د روغتیایي کنټرول لپاره تدابیر بېرته جدي کړي دي.
دا تدابیر وروسته تر هغې جدي شوي چې د راپورونو له مخې، د شنبې په ورځ په چین کې د کرونا ۱۶ پېښې په هغو مسافرو کې رامنځ ته شوې چې دغه هېواد ته تللي دي. په روسیه کې بیا د کرونا د پېښو شمېر ۶۳ ته رسېدلی او دغه هېواد هغه رېلونه هم درولي چې د اوکراین، لاتویا او مالدووا ترمنځ یې تګ راتګ کاوه.
په ایران کې د کرونا د مثبتو پېښو شمېر ۱۳ زرو ته رسېدلی او د یکشنبې تر ماښامه له دې امله د مړو شویو کسانو شمېر هم ۷۲۰ ته رسېدلی و.
د ایران ایسنا خبري اژانس د دغه هېواد د کرونا پر وړاندې د مبارزې چارواکو په حواله راپور ورکړی چې په دغه هېواد کې روغتیایي مرکزونه ورځ تر بلې د کرونا پر وړاندې د مبارزې توان له لاسه ورکوي.
په همدې حال کې د ایران د چارو ځینې کتونکي وایي، د ایراني چارواکو د راپور ورکولو چارې شفافې نه دي او ممکن له ورکړل شویو شمېرو زیات کسان پر کرونا اخته وي.
کرونا ویروس چې اوسمهال د نړۍ نږدې ۱۳۰ هېوادونو ته رسېدلې، د پراخېدو په حال کې دی، خو په اکثرو هېوادونو کې د ویروس د لا خپرېدو مخنیوي ته جدي تدابیر نیول شوي او دغه چارې ورځ تر بلې ګړندۍ کېږي.
