د اتصالات مخابراتي شرکت د افغانستان د کرکټ دوه ستوري حشمت الله شهیدي او ګلبدین نایب د خپلو سوداګریزو استازو په توګه اعلان کړل. د دې تړون رسمي مراسم د عربو متحده اماراتو کې ترسره شول، چې پکې د اتصالات مشرتابه او افغان لوبغاړو ګډون درلود. د اتصالات عمومي مشر متیو ویلشیر وویل، “د افغانستان د کرکټ بورډ د رسمي ملاتړي په توګه، موږ تل هڅه کړې چې د افغان کرکټ ملي لوبډلې د بریا برخه شو. د شهیدي او نایب غوره کول زموږ ژمنتیا څرګندوي.” د اتصالات اجرائیوي مشر محمد عثمان هم د دې همکارۍ ستاینه وکړه او زیاته یې کړه، “دوی د اتصالات ارزښتونه منعکس کوي، او موږ باور لرو چې دا ملګرتیا به زموږ پیریدونکو ته ګټوره تمامه شي.” حشمت الله شهیدي او ګلبدین نایب دواړو د دې ملګرتیا له امله خوښي وښوده او ټینګار یې وکړ چې اتصالات د افغانانو لپاره کار کوي. اتصالات هیله لري چې د دې همکارۍ له لارې له خپلو پیریدونکو سره خپلې اړیکې نورې هم پیاوړې کړي.
