سعودي عربستان اعلان کړی چې راتلونکې میاشت به د خامو تېلو د تولید اندازه د ورځې ۱۲.۳ میلیونو بېرلو ته ورسوي.
د سعودي حکومتي شرکت ارامکو تېره ورځ دغه اعلان کړی چې په دې کچه تولید یو ریکارډ بلل کېږي.
سعودي وروسته له هغې دغه اقدام کوي چې روسیې د خامو تېلو د تولید په کمولو کې له همکارۍ ډډه وکړه. له دغه اعلان وروسته په مارکېټونو کې د خامو تېلو بیې ۲۵ سلنې ټېټې شوې او دا په ۱۹۹۱ ز کال کې د خلیج له جګړې وروسته لومړی ځل دی چې د تېلو بیې دومره ټيټېږي.
د سعودي دولتي شرکت ارامکو ويلي چې په دغه کار سره به د سعودي د تېلو په تولید کې د ورځې ۳۰۰ زره بېرله نور هم اضافه شي. ارامکو په یوه اعلامیه کې ویلي: «شرکت له خپلو پېرودونکو سره موافقه کړې چې دومره تېل به ورته تولیدوي او دا به د ۲۰۲۰ ز کال د اپرېل له لومړۍ نېټې پيلېږي.»
یاد شرکت دغه راز ویلي چې دا کار به په اوږدمهال کې مثبتې اقتصادې اغېزې ولري. د سعودي عربستان په دغه کار سره د ونډو په نړیوالو بازارونو کې هم بیې راغورځېدلې دي او د ارامکو ونډه شاوخوا ۱۰سلنه راپرېوتې ده.
