بڼوال: زیاتو ورښتونو د باغونو پر حاصلاتو ناوړه اغېز کړی

په ارزګان ولايت کې بڼوال وايي چې د تېر سوړ ژمي څپې او ورښتونو د باغونو پر حاصلاتو ډېر ناوړه اغېز کړی او په وینا یې، سږکال د دوی باغونو ښه حاصلات نه دي ورکړي. د یاد ولايت د بڼوالو په وينا، د ژمي سړې هوا له کبله د بېلابېلو بوټو ګلان ساړه وهلي او هرڅه يې له منځه تللي دي. بڼوال وايي، سږکال په دغه ولايت کې د بادامو باغونو په ګډون يو شمېر نور باغونه چې هره کال بڼوال ترې ښه حاصلات ترلاسه کوي ساړه وهلي او  هېڅ د حاصلاتو ترلاسه کېدو تمې ترې نه کېږي. دوی وايي، له باغونو څخه د بڼوالو کم حاصلات به د دې لامل شي چې ډير بڼوال سږکال له اقتصادي ستونزو سره مخ شي.  د ارزګان د کرنې او مالدارۍ رياست هم وايي چې موسمي بدلون د دې لامل شوی چې په نږدې ټولو حاصلاتو کې د پام وړ کموالی راولي.